اسئله واجوبه تهم كل بنت
كان عندي حبوب.. وعملت كل شيء بس ما فيش فايدة؟!



لازم تستشيري دكتور أمراض جلدية متخصص علشان يشوف لكِ الحبوب دي من إيه؛ لأنك ممكن تكوني بتاكلي حاجة غلط أو جسمك حساس من حاجة معينة، فالدكتور هيشوف أسباب ظهور الحبوب دي ويقدّم لك العلاج المناسب.. ولازم تمشي على العلاج اللي هيقول لك عليه بالضبط وتستمري عليه وما تكسليش.



أنا عندي حبوب كثيرة في وجهي.. وعلاج الدكتور كان كويس جداً بس بينشّف لي بشرتي؟!



ممكن تستعملي كريمات أو زيوت مرطبة على المناطق الجافة بس، وما تحطهوش على وشك كله زي زيت "بيبي جونسون" أو "الفازلين".


وبالنسبة للبقع اللي بتظهر في الوش بعد علاج الحبوب؟!



لو بعد العلاج الحبوب تركت أثر ممكن تعملي تقشير للبشرة عند دكتور متخصص.



إيه هو تقشير البشرة؟!



تقشير البشرة هو عبارة عن علاج تجميلي للبشرة، وبيعتمد على نوع البشرة ونوع البقع، والطريقة دي بتعالج أثار الحبوب وبتخلي البشرة شكلها أفضل وملمسها ناعم، ويا ريت بعد ما تعملي التقشير إنك ما تتعرضيش للشمس كتير وتحطي كريمات حماية من الشمس.



إيه أفضل كريم حماية من الشمس ممكن نستعمله؟!


فيه كريم اسمه "فوتو درم ماكس" وده موجود في أي صيدلية ولونه أورانج ودرجة حمايته 100% وممكن تحطيه قبل الميك أب.



إزاي أتخلص من الرؤوس السوداء؟!


الرؤوس السوداء بتكون موجودة في المناطق الدهنية زي منطقة القورة والأنف والذقن، والمشكلة دي ممكن تحليها بإنك كل يوم أو يومين بعد ما تخدي الدوش تجيبي فوطة ناشفة وتحاولي تضغطي بالراحة على أماكن الرؤوس دي.. في كمان حاجة اسمها "Nose on" ودي موجودة في الصيدلية بتجيبيها وتستعمليها لإزالة الرؤوس السوداء.


بشرتي دهنية والبودرة مش بتثبت عليها.. ودائماً تجيّر لما أتعرّض للشمس؟!



البشرة الدهنية لازم الميك أب بتاعها يكون "OIL FREE" أو خالٍ من الزيوت علشان ما يعملش مشاكل في البشرة وما يطلّعش حبوب..

ويُفضّل إنك تستعملي البودرة الكومبكت؛ لأنها بتعمل تغطية كاملة للبشرة وبتداري الحبوب وبتثبت على البشرة لفترة طويلة سواء كانت بشرتك دهنية أو عادية.



عندي 19 سنة.. وبشرتي مختلطة عايزة ماركة كريم للصبح وبالليل؟!



ممكن تستعملي كريم ماركة "لوريال" ده حلو أوي وبتحطيه على بشرتك في اتجاه عكس عقارب الساعة.



أظافري بتطلع ببطء أوي وكمان لما بتطلع بتكون ضعيفة أوي وعايزاها تبقى بيضاء وجامدة شوية؟!



المفروض إن كل بنت تهتم بأظافرها زي ما بتهتم ببشرتها وشعرها وممكن تدهني أظافرك بزيت زيتون دافئ كل يوم.. وعلى فكرة زيت الزيتون مفيد جداً؛ لأنه بيقوي الأظافر وبيخلي شكلها أبيض وصحي؛ لأن فيه نسبة فيتامينات مفيدة جداً وبتساعد كمان على تطويل الأظافر.


إزاي أتخلّص من السواد اللي في الكوع والركبة؟!



الأماكن دي ممكن تحطي لها حاجة تبيضها؛ زي الشبّة أو دقيق الذرة وده بيبقى عامل زي السنفرة شوية، وبتخلطيه مع ترمس مطحون وشوية لبن صغيرين وتعملي بالخليط ده ماسك على المناطق الغامقة في إيديكِ أو رجليكِ وبتعملي الماسك ده مرة أو مرتين في الأسبوع وهتلاقي نتيجة كويسة.



إزاي أشيل الكحل من جوه العين قبل ما أنام؟!



هو المفروض طبعاً إنك بتشيلي الميك أب قبل ما تنامي بمزيل ماكياج وفي منه على شكل مناديل وفيه على شكل سائل أو كريم.



عايزة ماسك للبشرة يخلّي بشرتي كلها لون واحد قبل الميك أب؟!



أول خطوة لازم تعمليها هي إنك تهتمي بتنظيف بشرتك كويس بالليل والصبح، وتستخدمي كريم حماية من الشمس علشان تحمي بشرتك من أشعة الشمس الضارة واللي بتعمل بقع غامقة في الوجه.
وده ماسك كويس أوي ممكن تعمليه مرة كل أسبوع علشان تفتحي بشرتك وتخليها كلها لون واحد..



المكونات:
- ملعقة خميرة.
- كمية صغيرة جداً من الماء.
- ملعقة عسل أبيض.
- ملعقة دقيق أبيض.


الطريقة:
بتذوبي ملعقة الخميرة في الماء وبعد كده تحطي العسل والدقيق وبتخلطي المكونات كلها مع بعض وبعد كده بتفردي الخليط ده على وشك ورقبتك؛ لأن ساعات بنعمل الوش وبننسى الرقبة خالص..
اتركي الماسك على بشرتك لمدة نص ساعة وبعد كده تشطفي بشرتك بماء عادي.


الكحل بيسيح من عيني.. أعمل إيه؟!



لو اختارتِ قلم كحل كويس مش هيسيح، وأحسن ماركة قلم كحل ممكن تستعمليها هي "فلوريل" وسعره مش غالي أوي يعني بيكون في حدود 20 أو 30 جنيها، بس فعلاً بيكون شكله حلو أوي في العين.
وفيه حاجة تانية ممكن تعمليها علشان الكحل ما يسيحش وهي إنك تحطي لوس باودر "البودرة السايبة" تحت عينيكِ قبل ما تحطي الكحل وبعد ما تخلصي وضع الكحل بتشيلي البودرة الزائدة بفرشة البلاشر.


عايزة حاجة تثبت الميك أب لمدة طويلة؟



فيه حاجة اسمها "ميك أب إسبراي" وده بيتباع في الصيدليات الكبيرة وبترشيه على الوجه بعد ما تخلصي الميك أب، بس تاخدي بالك إنك ترشيه على بعد 30 سم من الوجه والإسبراي ده أنا بحطه للعرايس وللبنات اللي بتعمل ميك أب سواريه وده بيثبت الميك أب من 6 لـ 7 ساعات.



كنت عايزة أسأل عن البودرة المائية.. هل ممكن أستعملها؟!



أنا مش بانصح بالبودرة المائية خالص؛ لأنها بتضر البشرة جداً على المدى البعيد.





وفي النهاية أحب أقول نصيحة لكل البنات...

يا ريت ما تستخدموش أدوات ماكياج بتاعت حد تاني
يعني بلاش تستعملي مثلاً إسفنجة واحدة صاحبتك أو العدسات..

وخدي بالك إن قلم الكحل لازم يتبري من عين لعين..

يسلمووووووووووووو معلومات مهمه الكم يا صبايا .........

مشكوره لمسسسسسسسسه ع التميز

تحياتي الك

يسلمو لمسة عالموضووووووووووووووع

مشكور اسير الروح ع المرور العطر

تحياتي