صــوتي المبحوح
يقول المحبة ويش لو غابوا الاحباب
اقول الجسد من غير نبض وشعور وروح
يقول النهار يغيب وش موقفك لاغاب
اقول ان رضيت اسكت يصير السكوت البوح
يقول الستر سمعة وذكر وفعل وثياب
اقول المحب من الوله والسهر مفضوح
يقول انت قايل لي بسافر بدون عتاب
اقول ايه قبل اضيع في وجهك المملوح
قبل تبدي الاعجاب و ابادلك الاعجاب
قبل تاخذ احساسي وقلبي عبث وتروح
قبل ينفتح لك بين عوج الحنايا باب
ويبقى على طاريك طول العمر مفتوح
قبل لا اتوهق فيك ياالصادق الكذاب
قبل لا اتحطم منك يا المخطي المسموح
قبل لا تعلقني وترحل بدون اسباب
قبل لاتعلمني اعد السنين جروح
قبل يتبعك وانت تمادى جفا وغياب
قصيدي ودمع عيوني و صوتي المبحوح
ياليت الزمن يرجع واحسب لجفاك حساب
وعد ماتعلق فيك وانساك قبل تروح
